Matthew 10
Iesu Musosovosi'a ta Mitema sou Xaixai Noxou Mavulovexa Mo Mulu'elia Tamei
(Mak 3:13-19; Luk 6:12-16)
1 aIesu mu'avali'a ta molomolo noxou mavulovexa mo mulu'elia tamei mine'e noxou, la mulosi'a xavi sou ikusai'a ta uleenu ta masumasua iuatu noxi'a ta mitema xe ipamauline'i ane'i ane pipiena iouiou mu'oxone'i. 2Ane'i ta molomolo mavulovexa mo mulu'elia tamei ne ualaualasi'a aloxo 'o. Vile Saimoni, ualasou vile lexe Pita ilou vimou Andeleasi mo Sevetaio ta 'olu ta tamei Iakovo ilou Ioanesi. 3Mo Pilipi mo Vatolomaio mo Tomasi mo Mataio itema sou uno'u lamoli mo Iakovo, Alipaio 'olu mo Tadiasi, 4Mo Saimoni anu itema vile noxi'a ane'i ane ixavutala lexe ane'i me'a isaxila'u tualasi'a xe Iudasi e anu muitalonu Iesu no avo'a ta mitema sou mivau. 5Ane'i ta molomolo mavulovexa mo mulu'elia tamei ne Iesu mupalusi'a milai la mupela'a aloxo 'o. “Mamu sou ngalai noxi'a ta mitema ane ane'i ta Iutaia uasi, mo nga'unalai no tuala ta tatila ne Samalia uasi.” 6 bIa ngalai noxi'a ta sipsip ne Isilaeli e mixovulaune'i. 7 cMo lexe ngalai la nga'alo lexe saxisaxila'u noxou Lataua a mune'e 'alai mukalu. 8Ngapamauline'i ane'i ane mipipiena, mo ngatulusi'a ane'i ane misoisoli mo ane'i ane vulukali mu'oxone'i la ixali malemalenga xe ngakusai'a ta uleenu ta masumasua e mixolu noxi'a ta mitema. Mii ma'ia ngingi ngeno'u ne ngeno'u vitanisi la sou ngingi ngalosi'a ta mitema vitanisi. 9 dMo mamu sou ngano'u lamoli xoulu mo siliva xe kopa ngataanu no vasimenge. 10 eMo ngamuamua'i la ngano'u tiva aoao mo ngano'u tokolomo veveeni ta tamei mo siove sou tava'inge xe vilaxo sou ngavilaxo no anu uasi. Xo itema sou xaixai umuamua'i la ane'i ilosou mimii. 11Xe ngingi nga'unalai no tuala tila mo no tuala vile la ngingi ngakamulinu laixe 'o lexe itema 'ei no tuala ane ne anu laixe mo itema mulapu, la sou ngingi ngongi'a itema ne ngaxolu ulai uxali no voxo ane lexe ngingi ngasuku no tuala ane ne. 12 fLexe ngingi nga'unalai no tani vile la ngavikalane'i ane'i ane ixolu no nano no tani ne lexe, “Lataua uxolu noxinge.” 13Mo lexe nga'unalai no tani vile xe ane'i i'osasinge, la ngingi ngavikalane'i lexe opo se'isisi ne uxo noxinge xe i'osasinge uasi, la opo se'isisi ne ulivu une'e noxinge. 14 gIa lexe ngalai ngaxali no tuala tila vile xe no tuala vile ia ta mitema sou tuala ne i'avalinge mo ino'inge nga'unalai no tani uasi mo ilomungenge uasi, xe no mine ngalaa la ngavutasou lomulo no tava'inge ia ngasuku ngalai no tuala vile la. 15 hEni avikalangengi manina lexe, no anu voxo sou ta mitema itulu no anu vaivaikala la tuala tatila ne ino'u tu'utu'umaxu tatila manina ua'ulixu tu'utu'umaxu noxi'a ta Sodomu xe ta Xomola.Tu'utu'umaxu Tavu'alo Uxali
(Mak 13:9-13; Luk 21:12-17)
16 iEni apalusinge ngalai loxo ta sipsip ilai no taine'i ta a'aa ta vova. Aloxo ne la sou ngingi ngamulinu 'ilixo noxi'a ta sinana ta veveeni mo ngaxavutalanu mii ma'ia sou lexe ngingi nga'oxonu mo ngamulinu 'ilixo laixe noxi'a ta ngiala ta kuau. 17 jMo ngasaxila'inge laixe noxi'a ta mitema. Xo ino'inge la ilai itulusinge no anu vaivaikala no ie'i ta tatila no anu pita noxi'a la ipuapuasinge no nano no taasou lalotu noxi'a. 18Tava'u xo ngingi noxilo, la sou ane'i itulusinge no ie'i tamitema sou xaixai noxi'a ta tamutuxu tuatuala mo tatananu tuatuala, la sou ngingi ngaavuti sou nga'aloxu a'alo laixe ulai noxi'a xe ulai noxi'a ta mitema ane ane'i ta Iutaia uasi. 19Xe lexe itetelisinge ngalai ngatulu no anu vaivaikala, la ngaxavutala piena no 'a vaikala sou ngalemolu uasi, mo ngaxavutala lexe ngavikala a loxovaa uasi. Xo no voxo ane ne vaikala uxali no anangenge vitanisi. 20 kLa sou ngingi ngalavusou lexe ngingi ane ngavivikala ne uasi. Uleenu noxou Maminge ane uxolu noxinge la uvivikala ne. 21 lItema vile uavuti la ukalanu vimou sou ivau usoli, mo ta molomolo kalumo ne ta mami'a i'oxoo aloxo ne noxi'a. Xe ta 'ili'ili'a ne, iavuti xe iasaxai'a ta mami'a ilo'a ta neni'a la ikalane'i ulai sou ive'a isoisoli. 22Ulai la ta mitema imasaxainge uasi xo ngingi noxilo, ia 'ena'ei ane utulu pekia'u ulai utalo no anu soli la Lataua upamaulinu. 23Mo lexe i'oxoo masuangengi no tuala vile, la nga'ume ngalai no tuala vile. Mo avikalangengi manina aloxo 'o, ngingi ngalai ngakalusou tuatuala ta tatila no nano no tuala tila ne Isilaeli uao ia Itema 'Olu une'e.24 mMolomolo anu utila noxou tilasou e ulosiou lavulavu uasi xe itema sou xaixai anu tila noxou tilasou uasi. 25 nAnu laixe lexe molomolo ne uxali umomomo loxo tilasou sou ulosiou lavulavu la anu mumomomo. Xe itema sou xaixai kalumo uxali umomomo loxo tilasou. Ia lexe tatananu tani ilemolu lexe Velusavelu ne uxolu no nano no tani ne, la ane'i ane mixolu no nano no tani ne ileme'a lexe ane'i ta masua manina.
Ta mitema I'umolu Lataua
(Luk 12:2-7)
26 oLa sou nga'ume noxi'a ta mitema uasi xo mii ma'ia ane misu'asou mo mitalumeiou ne ulai ili'i la upala'a xo mii ma'ia ane mutalume ne ili'i la utalume uasi. 27Mo vaikala ma'ia eni evikalangengixu no isivoxo 'o ne ngingi ngaa'aloxu no lamana. Mo mii ma'ia emunusou no sangalinge ne ili'i la ngalai ngatulu teitexi no tani kisou la ngaa'aloxu noxi'a ta mitema. 28 pMo mamu sou nga'ume noxi'a ane'i ane ivau vasimengesi usoli, ia imomomosou ivau uleengengi uasi. Ia laixe lexe nga'ume noxou Anu ane umomomo sou ukalusou vasimenge xe uleengengi no anu navu e kaluxu uasi. 29Ia ngingi ngelavu lexe ta mitema ilotone'i ta ngiala kitukitu tamei no anu kesi vile. Ia Lataua usaxila'u mimii iouiou mukalusi mo lexe mii vile u'oxonu ngiala kitu'a vile ne usoli, la Lataua mulavusou. 30Mo laxusinge no kisinge ne Lataua muitisou mukalu. 31 qLa sou nga'ume mamu xo ngingi ngeuaulixa'a ta ngiala ta kitukitu moso ne.Nenge Mamu sou Tamaela Mo Tavikala Lamana Lexe Nenge Taxolu ta Mitemau Iesu
(Luk 12:8-9)
32La sou 'ei ane uvikala lexe anu ulavusilo no ie'i ta mitema, la eni kalumo avikala lexe eni elavusou no iou Mamilo teitexi no opo loxotolo. 33 rIa 'ei ane uvikala lexe anu ulavusilo uasi no ie'i ta mitema, la eni kalumo avikala lexe eni alavusou uasi no iou Mamilo teitexi no opo loxotolo kalumo. 34Loxo io ngingi ngaxavutala lexe eni ene'e sou akalusou 'oto'oto no lia 'o uasi, eni ene'e 'o sou axalixu 'oto'oto no taingengi. 35 sMo eni ene'e sou axalilixu kalipala la, itema 'olu mulu uxiu u'oxo masua noxou momu xe 'olu sema i'oxo masua noxie nenie xe ua'ane i'oxo masua noxie nenie. 36La ane'i ane ilo'a itema ne ixolu no tani ne ixiu imolosila ne'i ngatongato'o. 37Mo 'ena'ei ane umasaxai'a momu ilee nenusi manina ia umasaxailo manina uasi, la anu noxilo uasi. Mo 'ena'ei ane umasaxau 'olu mulu ilee 'olu semasi manina ia umasaxailo manina uasi la anu noxilo uasi. 38 tMo 'ena'ei ane utavulenu ovu valautu noxou ia umulileli uasi la anu noxilo uasi. 39Mo 'ena'ei ane tanuxu maulixu ne ili'i la uxovulaunu, xe 'ena'ei ane ulosou maulixu sou ua'aloxu a'alo laixe noxilo ne ili'i la anu uxalisou mauli. 40 uMo 'ei ane u'osasou uno'u itema ane eni epalusou, la anu u'osasou uno'ilo kalumo. Xe 'ei ane u'osasou uno'ilo, la anu u'osasou uno'u anu ane mupalusilo. 41Mo 'ei ane u'osasou uno'u itemasou palomatana xo anu itemasou palomatana ne ili'i la anu uno'u ulu loxo ane'i ta mitema sou palomatana mino'u. Mo 'ei ane u'osasou uno'u itema mulapu la anu uno'u ulu iou vilesisi aloxo itema mulapu uno'u ne. 42Xe 'ei ane ulosi'a ane'i ane ualasi'a uasi lexa sou iiexu xo ane'i ta molomolo noxilo, la eni avikalangengi manina lexe itema ne umomomo sou uno'u na'u ulusou kalumo.
Copyright information for
ATA